Bulle

Falls ein vo Eu scho parket z‘ Wil
en aktuelle, heisse Tip
es git e neus Versteckisspiel
s’isch eifach und heisst Allez-hip.

Ganz vorne lueget eine i
dä sött e Dächlichappe ha
s’tör ungeniert en Tschumpel si
die andere warted hinedra.

Denn chunnt Retour-Kutsche-
die hine wüssed wie dä goht
en jede git en Tritt in Arsch
dem Halbschueh wo ganz vorne stoht.

D’Moral vo dem Vers törsch nur tengge
denn dä wo’s a-goht isch so stur
dä chönd’sch em Stadtmuseum schenke
als hohli Chasperlifigur!

«Es stinggt vo hine bis nach vorn
drum legg i d’Karte uf de Tisch
si hegget Sitzig schiints, au morn
obwohl, das Schmutzige Dunschtig isch.

So öppis isch doch nöd normal
i glaube bald, die wönd üs legge
und hend en Maskeball im Saal
wo’s chönd mit Larve s’Gsicht verstegge.

Wenn jede so ne Maske treit
und anonym bliibt bis zum Schluss
denn heisst d’Prämierig: Fätzli gleit
und Piff Paff Puff und du bisch duss.

D’Moral devo: Das Parlament
cha gar nöd us em Rahme g’heie
denn s’Motto scho en jede kennt:
Ali-Bla-Bla und 40 Papageie.

Bim Gipfel hätt de Furgler z’Genf
z’mitzt uf de Chopf de Nagel troffe
will er uf russisch seit sin Senf
för s’Imitsch und för s’Gorbatschoffe.

Jetzt chömmed d’Wiler nüme drus
denn d’FGW hätt immer gseit
de Stadtamma sig, ohni Schmus
de beschti Redner wiit und breit.
So wird’s au bliibe, das isch klar
de Vatikan gseht’s au scho i
es het de Wiler.Superstar
um s ‚Mul bereits en Heiligeschii.

D’Moral, die lömmer uf de Siite
denn, was goht üs de Furgler a
di gröschti Schnörri, unbestritte,
hätt trotzdem üsen Stadtamma.

De Wiler Radio Öski hätt
es Wort zum Sonntag importiert
das findet Villi gar nöd nett
und üsi Pfärrer sind schockiert.
Wie wenn das wör e Rolle spille
wohär das Wort zom Sunntig chunnt
denn s’Radio Wil isch doch kei Chille
au nöd wäg därä Viertelstund.
Im Gägeteil, bis üsem Sender
hätt’s wie bim Zoo im Zirkus Knie
Dressierti, bravi Bockmistspender
trotz Management und Hierarchie.
D’Moral: Die Wiler Schwachstromleitig
brucht viel me Rasse und meh Schwung
vor allem aber ziemli gleitig
e besseri chemisch Reinigung.