Bulle

Hüt am Gümpelimittwoch Obed,
wo überall scho d’Fastnacht tobed,
und öppe eine s’Gwüsse ploged,
will er sich z’wiit uf’s Glattis gwoged,
erklär ich wieder eimol meh,
im Name vo de FGW,
de Wiler Bögge gross und chli:
Offiziell söll si hüt eröffnet si!

Als Herold isches mini Pflicht,
z’verläse de närrisch Johresbricht.
Drum, ihr liebe Wiler Narre,
fahr ich öppe eim an Charre!

Huh ä Lotsch!

Zu de Weltlag
Muesch d’Zitig nöd läsä, chasch au rote,
d’Welt isch komplett us de Fuege grote!
Früener zellt hend Toleranz, Freiheit und Demokratie,
hüt führt de Tüüfel höchstpersönlich Regie:
De Ueli Muurer, mir hends ali gseh,
als Gruess-Clown bi de AfD.
Und de Oskar Freysinger, die Ober-Gurke,
verbreitet Propaganda vom Putin und sine Schurke.
Jo, sogar üsi Karin Keller-Sutter, chum zum glaube:
macht am Trump schöni Auge!

Do z’Wil ischs au nöd besser worde,
no öppe ein verdient en Narre-Orde:
De George Weber tuet sich d’Händli riibe,
mit sinere Thurcom GmbH de Andi Breitemoser in Wahnsinn triibe,
de grabt für d’Fernwärmeleitig halb Bazeheid um,
me munklet ohni Bewilligung.

De Semphoniker goht en Räuber an Schatz,
üsen Wiler Rebberg wird Opfer vom böse Spatz,
fies au wenn digital zahlsch im «sZelt»:
verlanget für Uslandszueschlag 1.5 Prozent meh Geld.

D’Stadtmarkt-Mieter hend s’Stadtfest ufen Parkplatz vertriebe,
de Dani Wyler het im Akkord Leserbrief gschribe,
d’Stiftig Hof het de Stadt de Wirt abgworbe,
d’Stadtsaal-Beiz drum halb usgstorbe,
de Harry Brack wott d’Redaktion vo de Wiler Nochrichte überneh,
chasch Lenggewiler es Polizeiauto mit Konfetti fülle gseh (Jufale!),
und üses Parlament, statt meh Stüüre hole bi de Riiche,
tuet lieber Chinderspielplätz striiche!

Öb d’Welt echt au künftig so funktioniert?
Sind gar nöd die, sondern mir selber verwirrt?
Denn müend mir üs arrangiere,
bevor s’Bundesgricht wird interveniere.
De Silo machemer zum Mäder-Tower,
Wil TV zu Fox-News,
mit Strofzöll d’Stadtfinanze saniere wär eh schlauer,
Bettenauer Weiher? Mir mached de Golf vo Wil drus!
Am Ölberg heissts bald «drill, baby, drill!»
Und d’Muur zahlt de Thurgau selber, die choschtet üs z’viel.

Es git nur ein Usweg us dere Gschicht:
mir ali werdets hoffentlich mol gseh,
de Donald Trump, de chunnt vor Gricht,
het de Uftrag für d’USA-App sinere eigete GmbH geh!

Huh ä Lotsch!

S’Bonbon-Malheur
Am Umzug fröhlich und voll Schwung,
hoch obe ufem Prinzewage,
fühlt sich d’Prinzessin Carmen Mettler bsunders jung,
wörft überstellig Süesses abe.
Nöd königlich und gar nöd zart,
wörft si ein BonBon bsunders hart.
Treffsicher wie en alte Hase,
spickt das Teil am Jigme Shitsetsang a d’Nase.

De stadtrötlich Rüssel, rot und chrumm,
s’fründliche Gsicht mit Bluet verschmiert,
s’Prinzessli vor Schock ganz plötzlich stumm,
do isch en chline Seich passiert!
Als wärs nöd gnueg, de gueti Maa,
heg spöter no es Fotoshooting gha.
Het d’Bilder glaub am Grafik-Profi geh,
süscht hettmers uf de Wahlplakat jo gseh.

D’Moral vo dere Gschicht, s’isch wohr:
Süessigkeite sind nöd nur für d’Zäh e Gfohr!

Huh ä Lotsch!

De Bundesgrichtsentscheid
Me hetts gläsä oder ghört,
s’Bundesgricht het üsi Meitlisek zerstört!
Noch 200 Johr Tradition,
für üsi Äbtestadt en Hohn,
mue sich s’Kathi neu erfinde,
es Truurspiel ufem Buggel vo de Chinde.
Statt Bewährts zerstöre und verflueche,
wäred ihr Richter die Schuel gschider mol go bsueche,
wer sich es Bild macht im Huus und ufem Gländ,
merkt schnell, das ihr en Schmarre gschribe hend!

De Beschwerdefüerer triibts no toller,
d’Red isch vom Parlamentarier Sebastian Koller,
hett d’Urteil immer witer zoge,
Hartnäckig ischer sehr, nöd gloge.
Als Problemlöser tuet er sich gseh,
de Entscheid heg endlich Klarheit geh,
doch zeigt de Blick abe vo de höchste Stufe:
klar sind höchstens d’Scherbe i dem Scherbehufe!

Huh ä Lotsch!

Und das Urteil, s’gnau «was» und «wie»,
das wird Konsequenze noch sich zieh:
S’Bergholz macht Schluss mit Sauna nur für Dame,
s’«Hose und Rock am Weier» het en neue Name,
gschlechtertrennti Mannschafte chasch vergesse,
Grittibänz dörfsch nüme esse,
Bald gits e Wiler Wehrpflicht für Fraue,
nur no Unisex-WCs dörfsch baue,
Blauring und Jungwacht, Schnee vo gescht,
gar keis Gschlecht me ha wär s’bescht!

Und wehe trausch di azspreche nur,
s’chrischtlich Fundament vo üsere Kultur.
Christophorus im Schnetztor: haus!
a dini Stell chunnt jetzt de Micky Maus.
Advent und Wiehnacht müend verschwinde,
d’Fastnacht dörf nüme stattfinde,
de «Klosterweg» wird zum «Kloster weg!», de Richter wörs gfalle,
und üsen Kanton heisst künftig nur no «Galle».
Heikel wird’s au für Getränk mit Gärig,
d’Faschtezit wird zum interkulturelle Fescht vo de gsunde Ernährig.
Oh Städli Wil, wo führt das nume hi?!
Womöglich stellets no de Herold als Lehrer i!

Huh ä Lotsch!

Polit-Knall
Noch über 30 Johr im Parlament,
isch er dä Lokalpolitiker wo jede kennt.
Sini Vote: striitbar und markant,
mol ernsthaft und mol amüsant,
hüüfig au sehr provokant,
hartnäckig und selte entspannt,
rhetorisch aber brilliant,
en zueverlässige Bulleversli-Lieferant!

Doch statt e Uszeichnig miteme Orde,
überwiegt denn doch d’Kritik,
de Guido Wick isch abgwählt worde,
en Knall i de Wiler Politik!
Mir wüsseds ali, kenned die Quale,
so isches halt i de Politik und bi de Wahle,
mol ischmer bi de Gwünner, mol bi de Loser,
für beides gits en Bluemestruss vom Ruetishuser!

Huh ä Lotsch!

Wahl-Krimi
Da hets no nie geh i de Schwiz,
d’SVP het en Wiler Stadtrots-Sitz!
Doch chum gits i de Regierig e Lugge,
wönds grad e zweiti Person inetrugge.
De Andi Hüssy zuesätzlich zu de Ursi Egli,
me meint das de grad no s’Präsidium regli.
S’Volk vo dem Plan nöd würkli angetan,
da grenzt halt scho a Grössewahn,
s’Resultat enttüscht denn sehr,
gad beidi verpassed s’nötig Mehr.
Im Nochhinein, i sägs jetzt fii:
e ziemli schlechti Strategie.
Bi zwor nöd sicher, schüss jetzt dri:
isch die vom Erwin Böhi gsi?

Zum de Sitz no chöne bhalte,
gäbs en Trick, scho biz en alte:
Links-Grüe machts vor mit eim Kandidat,
d’SVP wär für das au parat,
doch für d’FDP ischsi en Stuss,
d’Idee vom bürgerliche Schulterschluss.

Als wärs nöd gnueg i dere Gschicht,
veröffentlicht d’GPK ihren «Mobbing-Bricht»,
d’SVP loht sich vom Trump inspiriere,
tuet das Papier völlig anderscht interpretiere.
D’Ursi gestoht denn doch no Fehler i,
doch mit de Wiederwahl isches verbi:
D’FDP gwünnt, d’Egli gstoppt,
usem Stadtrot usegmobbt.
Wer hets denkt, aber so chunnts,
gwählt werdet Hinz…äh Nick und Kunz.

Für d’SVP gits wie immer nur ein Grund:
di Lingge und di Grüene sind a allem tschuld!

Huh ä Lotsch!

Skyline
Vo Süde muesch di a di neu Skyline gwöhne,
katholisch Wil tuet sini Usse-Alag echt verschöne.
Hinderem Pfarreizentrum stoht en riesige Turm,
massiv erbaut, dä trotzt jedem Unwetter und Sturm.

Us Stahl, verchromt, isch d’Konschtruktion,
es glänzt und spieglet vo wiitem schon!
D’Oberflächi mit Silber, gäge de Roscht,
es isch egal, was s’Kunschtwerk choscht!

Dä Turm hät Etage, das gseht me gli,
doch für Bürorüüm sind’s es bitzeli z’chli
Noch em Nutze vom Turm ich darum suech,
entdeck us de Nöchi plötzlich s’Wort «Buech»!

Nöd nu uf dütsch, nei au alli Asylante,
chönds läse i ihrer Sproch, au d’Esperante.
Au d’Türke, d’Japaner, d’Rumäne und Beduine,
vierhundert Sproche findsch vorne und hine!

Zum Abschied vom Franz Schibli find ich’s toll,
mit zweitusig Büecher isch de Schrank denn voll!
Als Sozialarbeiter isch es natürlich sin Wille,
alli Völker z’vereine i de katholische Wiler Chile!
Doch vo Integration tuesch dich wiit entferne,
s’Ziel wär doch, das alli dütsch würded lerne!

Huh ä Lotsch!

Üsen Stadtrot
Andi Breitemoser, du heimliche Schuft,
verprassisch 75 Millione für heissi Luft.
Chasch trotzdem fröhlich a jede Alass go,
die TBW lauft jo sowieso.
Aber öppis bringt mi zum sinniere,
jetzt wotsch das Ding au no privatisiere,
Schritt für Schritt,
bises für dich nur no Lohn, aber kei Büez me git!
Und wird’s mol kritisch, tuet e Kommission biz bohre,
ghöri fascht nur de Marco Huwiler schnorre.
I ha en Rot, i meins nur guet:
Pass uf das du ihn und nöd er dich füere tuet!
Gib au biz Gegestüür, süscht chunnt de Event,
womer dich als Nörgeli verbrennt!

Huh ä Lotsch!

Jigme Shitsetsang, has schomol gseit, i weiss:
dis Departement trüllt sich im Kreis!
Bezüglich Schuelhuus Städeli, s’isch wohr,
simmer bald glich wiit wie vor 15 Johr.
D’Idee vom Schuelzentrum im Norde,
isch mit wuchtige 66 % abglehnt worde.
Und s’nögscht Projekt, es haut mi um:
schowieder es tüürs Provisorium!
Me het versproche, da weiss nöd nur i,
de Pavillon Langacker seg s’letschte gsi.
Bi dene viele Zuesatz-Schlaufe,
chasch s’Projekt i «Schule 3020» umtaufe.
Fertig verwaltet, jetzt heissts agiere,
süscht wirsch als Nörgeli explodiere!

Huh ä Lotsch!

Manuel Nick, scho viel vo dine Vorgänger hend gfluecht,
du hesch es schwierigs Departement usgsuecht.
De Gare de Lion zeigt doch exemplarisch:
das au noch bald 10 Johr Planig nöd viel klar isch.
Wenn nödmol e Sanierig zitnöch funktioniert,
chasch du mit dine grad mol 36 Lenzä,
als Stadtrot no so glänzä:
bis bi komplexere Projekt öppis passiert,
bisch du scho sehr lang pensioniert!
I weiss, i bi jetzt biz en böse,
aber im Hochbau söttmer endlich d’Handbrems löse.
Wenn witerhin fascht nünt passiert,
wirsch bald als Nörgeli flambiert!

Huh ä Lotsch!

Conny Kunz, als politisch unbeschriebes Blatt,
machsch dini Wähler mit Fischknuschperli satt.
Mit Erfolg: noch Dekade SP-Vorsteherschaft,
hets e Freisinnigi zur Sicherheits- und Sozialminischterin gschafft!
Als einzigi Frau under dene knuschprige Manne,
muesch ufpasse, süscht hauets denn dich i d’Pfanne,
sit Johre fahrt dini Partei dem Departement an Charre,
jetzt muesch zeige öbmer würkli so viel chan spare.
Wenn nöd, das chani jetzt verkünde,
werdmer di als Nörgeli azünde!

Huh ä Lotsch!

Hans Mäder, du als Bappe und als Chef,
vo dem mässig erfahrene Stadtrotstreff,
bisch zueständig, au wenns nöd wönd,
das mit ihrem Sackgeld guet umgönd.
Bi dem Finanzplan gsehnis cho,
muesch de Fox im Hanspelz useloh.
Und wirds ganz eng, i kenn en Kniff:
Frög de Ex-Kassier vo de Semphoniker, de hets im Griff!
Für die Useforderige bruchsch en lange Schnuuf,
süsch gohsch als Nörgeli i Flamme uf!

Huh ä Lotsch!

Es paar Churzi
Und jetzt noch dene lange Gschichte,
bricht ich vo wiitere Bösewichte.
I churze Vers wird jetzt verzellt,
und öppe ein an Pranger gstellt!

Uf kein Fall wotten verunglimpfe,
trotzdem mueni mitem Nikolaus biz schimpfe.
Für Gross und vor allem au für Chli,
isch de Chlaususzug scho immer es Highlight gsi.
Noch 99 Uszüg bisch jo fäng en Alte,
und biz Regewetter sött di doch nöd störe,
die Tradition müemer doch erhalte,
aber mit nur vier Nikoläus duss chasch au grad höre!

Huh ä Lotsch!

D’Wiler Tüüfelsgilde wogt es Experiment:
dasmer d’Tüüfelsawärter vor de Ufnahm kennt,
gits neu en Nuggi mit de Nämä,
so dörfsch di eis Johr tüüflisch schämä.
Als Wiler-Baby-Tüüfel beobachtet und usspioniert,
bevormer di als Tüüfel akzeptiert,
au denn nur, es isch biz e Qual,
mittels anonymer Wahl!
Wa chunnt als nögschts? I gsehs scho cho:
e markierti Su-Nabelschnur als Wiler-Tüüfels-Embryo!

Huh ä Lotsch!

De Hof zu Wil, er isch bekannt,
bald au als UNESCO-Weltkulturerb anerkannt?
So wotts d’Stiftig, baut und investiert,
de Hof wird zum Tourismus-Hotspot umfunktioniert,
Si sölet sich lohne, die 30 Chischte,
me fabuliert vo tuusige vo Wuchenend-Tourischte!
Doch hesch vo de Arbet mol chli Rueh,
spaziersch am Sunntig is Städtli ue,
freusch di sehr uf Trank und Spiis,
denn isches scho es bizli fies:
wer het denn das so doof beschlosse?
S’Restaurant isch usgrechnet jede Sunntig gschlosse!

Huh ä Lotsch!

Oh, Stiftig Hof i üsem Städtli chli,
mängmol bisch scho achli hinedri.
Di innovativ Idee es Bier z’lanciere,
tuet sit 22 Johr scho existiere,
wött 1:1 s’Konzept vo Thurbobräu kopiere,
aber mit Schüga statt IdéeWil kooperiere.
S’Offesichtlich wottsch nöd gseh:
Me müesst de Uftrag Feldschlössli geh.
Wörsch nämlich cheibe Choschte spare,
Stichwort: Synergie,
täglich gsehsch en Laschti vo Basel anecharre,
het vakuumierte Mittagstisch-Frass debi.
Dem hett d’Nancy Flury amel eifach befohle,
uf sim Weg z’Rhifelde no paar Fässli z’hole!

Huh ä Lotsch!

En arme Tüüfel chunnt ganz älai,
ohni Sublootere wieder hei.
Im Tiger hetter si gnussvoll gschwunge,
debi es fröhlichs Tüüfelsliedli gsunge,
chunnt eim znöch as Gsicht,
und die Sublootere isch Gschicht!
Die Grüsel-Szene wird er nie vergesse,
si isch nöd grisse, für das chaner bürge,
ein hegi zuebisse und si fascht ufgfresse,
Pfui Tüüfel, do chunnter halbe s’Würge!

Do frögsch di: wer tuet echt so blöd?
Bi de Antwort traui mine Ohre nöd:
Christoph Mächler, riss di zämä,
süscht wirdmer di bald als Nörgeli verbrenä!

Huh ä Lotsch!

Damit üsi Füürwehr guet cha funktioniere,
müends regelmässig go trainiere,
öb underem Tag oder i de Nacht,
me het das au spontan mol gmacht.
Klar muesch plane, Betroffni informiere,
doch sit neuschtem ghörsch de Amtsschimmel wiehre!

E Meldig langet, so ischs scho immer de Bruch,
doch zmol stohtmer de Führwehr uf de Schluch.
Da gäng so nüme, s’seg doch klar,
nünt goht ohni usgfüllti Formular.
Für de SVRW en Fluech,
für jedi Üebig bruchts neu es Gsuech!

Stefan Sieber, die erhöhte Kapazitätä,
wäred denkt für zuesätzlichi Aktivitätä,
für Chundeservice und zum Aläss organisiere,
nöd zum d’Führwehr schigganiere!

Huh ä Lotsch!

Wenn en Ex-Hofnarr Bundespräsidentin wird,
wird vo allne Hofnarre Präsenz markiert.
Me stoht binenand, ganz dicht,
Orde und Hofnarrehuet sind e sakrali Pflicht!
Nur ein Querulant, me finds nöd guet,
treit zwor sin Orde, aber nöd de Huet.
Debi ischs gar nöd kompliziert:
de hät sini Glatze für öppis anders reserviert.
Roman Giger, chasch wieder höre,
de Hofnarrehuet wird under de Mitra nöd störe!

Huh ä Lotsch!

De Wiler Nachrichten fehlt es Korrektorat,
i de Grammatik drum nöd immer ganz parat.
Au i de Bulle wird übertriebe, paar Sprüch chömet flach,
de Herold isch mängmol au nöd ganz bi de Sach –
aber er isch au nöd Journi, sondern en Verkünder,
fahrt an Charre de Narre und de Sünder.
Lui Eigenmann, gib biz me Acht,
du hesch usem Herold de Sachbach gmacht!
Nei, au es Sachbuech bini nöd,
Sachlichkeit wär i de Bulle blöd,
chasch vo Glück rede, s’wär eher hange blibe,
hetsch de Name vom Frick falsch gschribe!

Huh ä Lotsch!

Und jetzt a ali s’Kompliment,
wo hüt es Bulle-Versli händ,
denn jede weiss doch wo vom Fach,
do drin z’stoh, das isch Ehresach!

Wie immer wird sie usegeh,
vom Herold vo de FGW.

Huh ä Lotsch!

Michael Sarbach, Herold der FGW