Bulle

Hüt am Gümpelimittwoch Obed,
wo überall scho d’Fastnacht tobed,
und öppe eine s’Gwüsse ploged,
will er sich z’wiit uf’s Glattis gwoged,
erklär ich wieder eimol meh,
im Name vo de FGW,
de Wiler Bögge gross und chli:
Offiziell söll si hüt eröffnet si!

Als Herold isches mini Pflicht,
z’verläse de närrisch Johresbricht.
Drum, ihr liebe Wiler Narre,
fahr ich öppe eim an Charre!

Huh ä Lotsch!

Adieu Hans, Adieu Demokratie
Loset zue, ihr närrische Fratze,
de Hans Mäder loht e Bombe platze:
I de Zitig hetter gescht informiert,
daser im August zruggtrette wird!
So machtmer da, er hets im Griff,
rechtzitig verloht er s’sinkende Schiff.
Überraschend chunnt das scho,
het jo quasi erscht grad d’Wahl agnoh.
Und grad mit Blick uf üsen Zaschter,
brücht no öppe es Gschäft es Pflaschter.
Natürli gäbts viel positivi Sache z’brichte,
de Hans verzeihts – säb sind kei Bullegschichte.
Immerhin wüssemer jetzt,
füren Zuefall wärs z’guet,
er sich im Stadtsaal es Denkmol setzt,
sobald s’Hans im Glück eröffne tuet!

E Nochfolg finde, das wird schwer,
d’Telefonleitige laufed heiss,
git s’Wiler Polit-Biotop öppis her?
Wenn, denn ganz en chline Kreis.
Und die Info chunnt so churz,
vorem fastnächtliche Regierigs-Sturz.
S’liit uf de Hand, ihr gsehnds au i,
mir chönntet s’ganz Johr luschtig si,
mitem läschtige Parlament wärs au verbi,
blibemer doch bi de FGW-Monarchie!

S’Prinzepaar fänds toll,
s’Volk wör vor Freud tanze,
zerscht kläremer da mit de Finanze.
D’Lösig: au mir erhebet Zoll!
Wer nöd sputet, mues tüür zahle,
ali wönd Wil plötzlich gfalle,
Firmene und Regierige us de ganze Welt,
bringet Rolex, Gold und Geld!

Sofort chammer öppis deale,
üses Grönland isch Rickebach-Wile!
D’Susanne Hartmann bringt die frohe Kund,
dass es gratis Nieselberg-Tunnel chunnt.
De Dominik Diezi vom Thurgau, das isch s’bescht,
schenkt üs au s’ganz Gebiet Wil West.
D’Firmestüüre vo Münchwile zieht Wil i,
oder d’Nadja Stricker wird nüme sicher si.
Wott de Trump mit üs abandle,
dörfer mit de Karin Keller-Sutter verhandle.
Bim Bundesgricht hausch uf de Tisch,
und s’Kathi blibt eso wies isch.
Ihr gsehnd: s’het Vorteil – nur,
sone Fastnachts-Diktatur!

Huh ä Lotsch!

Die hend en Pögg ab!
Üsen Iishockey-Club, e wildi Horde,
isch nomol Schwizermeischter worde!
En Grund zum fiire, Party mache,
mit Champagner und andere Sache.
Irgendwenn hets eim usghenkt,
gsehsch de Pokal flüge,
Platsch, im Wiler Weier versenkt,
diverse Lüüt chönd das bezüge.

Weg trüebem Wasser und Grümpel,
findschen nüme i dem Tümpel.
Zumen müehsam z’extrahiere,
müends Taucher engagiere,
das glingt, doch oh weh,
de Kelch het scho besseri Zite gseh.
Es fehled Schrube, im Lack hets Hick,
gheim bhalte, süscht chunnts no im Blick!

Wärer ihne, s’wär egal,
s’isch allerdings en Wanderpokal.
D’Gravure us mehrere Dekade,
hend nöd nur en liechte Schade.
Drum findt das de Verband,
e Frechheit und au allerhand,
die Trophäe wär zum pflägä und huldige,
d’Mannschaft mues sich denn entschuldige.

EC Wil, so stolz mir uf eu sind,
offebar sind eim paar Puck z’viel an Grind,
Hoffentli ziehnder us dere Aktion,
für d’Zuekunft au e Lektion.
Tüend eu uf d’Playoffs konzentriere,
süscht wireter als Nörgli explodiere!

Huh ä Lotsch!

Kolumbie-Connection
Üsen Parlamentspräsident,
damiter wird en weise,
und d’Welt es bizli kennt,
isch go Kolumbie bereise.
Uf Facebook hemmers gse:
De Dominik Egli mit Kollege us de SVP.
Sit viele Johre, chammer sägä,
tüend die Beziehige döt ane pflägä.

S’Land vom Pulver und de Palme,
vom Kafi und Zigarre qualme,
schöni Stränd, giftigi Tier,
au de Donald Trump hets im Visier:
Er und sini Deppe,
wönd de Präsident verschleppe,
vo Venezuela inspiriert,
döt hets schliesslich funktioniert.

Ich säg eu, liebi Lüüt und Chinder,
do steckt en böse Plan dehinder:
Mit dene Kolumbie-Konnektione,
wirdmer au üses Städli nöd verschone.
Weg Macht und Chole,
werdets de höchscht Wiler hole,
de ganz Stadtrot grad dezue,
vorane gänd die kei Rueh!

De Stadtrot nöd lang am studiere,
i voruseilendem Ghorsam am agiere:
de Andi Breitemoser d’Staatsbetrieb privatisiere,
d’Conny Kunz i Panzersperre investiere,
de Hans Mäder d’Stadtreserve i sini GmbH transferiere,
de Jigme Shitsetsang loht Landesverteidigung trainiere,
und s’BUV vom Manuel Nick? Oh weh,
het mol e Machbarkeitsstudie i Uftrag geh!

Huh ä Lotsch!

Parkplatz-Charme
Nöd nur de Herold isch schockiert,
was isch mitem Stadtfäscht passiert?
Kei Atmosphäre, nur Teer und Plastikzelt,
en frogwürdige Entscheid hends gfällt.
Muesch di inen Parkplatz presse,
wie e Sardine i de Büx,
all Meter BummBumm-Musig, öppis z’esse,
aso ehrlich, so isch das für d’Füx!

Das Fäscht söll s’Städli präsentiere,
mir müend üs nöd verstecke,
d’Innestadt besser frequentiere,
Läbe bringe i di schöne Ecke!
Aber eventuell isch das jo nur,
de Afang vo «Stadtfäscht On Tour»?

Di nögscht Usgob i de Ruetishuser-Ruine,
oder au mol i de Evoluo-Turm-Kantine,
alles i provisorische Modul,
s’BUV findt das jo cool.
Wil West würi au no gseh,
chasch d’PFAS-Pommes direkt usem Bode neh,
dezue Spaghetti mit Reifeabriibchäs,
da wär doch au no läss.
E Tüüfgarage hett ähnlich Charme,
hesch es Dach und s’isch au warm,
oder bliibemer doch grad i de eigete vier Wänd,
bi de Generation Z seg das jo Trend.

Liebi Stadtröt, i loh nöd lugg,
wott üses alte Stadtfäscht zrugg.
Hender nomol so e Schnappsidee,
wirdmer eu als Nörgeli brenne gseh!

Huh ä Lotsch!

Di verlore Tüüfels-Standarte
De Wiler Tüüfel führt vieles im Schild,
dasmol triibters bsunders wild:
Het einigi gar arg brüskiert,
woner sini HV uf Allerheilige datiert.
Als Gschöpf mit katholische Wurzle,
dörfsch denn nöd gümpele und purzle.
Allerseele isch für Gedanke denkt,
womer de Verstorbene schenkt.
De Galli Gübeli luut protestiert,
willmer die Tradition nöd respektiert,
i dem Verein cha er sich nüme gseh,
het sofort de Ustritt geh!

Bald frögt sich de Gilderot,
wies mit de Tüüfels-Standarte witergoht.
De Gübeli het das heilig Tuech mitgnoh,
er hegs dozmol produziere und segne loh,
vom Meinrad Gemperli ufem goldige Bode,
uf Bern a d’Bundesrotswahl seg die scho Zoge.

Fiirlich git er drum bekannt,
d’Standarte wird offiziell verbannt!
Unbekannt bliibt ihres Ziel,
ab sofort für 11 Johr, 11 Täg und 11 Stund im Exil!
E Rückgob seg nur garantiert,
wenn niemer vom alte Gilderot amtiert.
Au s’Datum kommunizierter klar:
im Johr 2038, de 23. Januar.

Bis denn chasch nume spekuliere,
wo das Stofferzügnis tuet logiere:
Bim Bischof Grögli in St.Galle?
Inere Wohnig vom Hausi Leutenegger würsere no gfalle,
Bim Tüüfel Petra i de USA?
Oder wott si echt de Ruedi Schär mol ha?
Eis isch sicher, so hets de Herold vernoh,
irgendwenn wird si wieder retour cho!

Huh ä Lotsch!

De Hobbyfotograf
Obacht, jetzt chunnts achli dick,
es neus Hobby heg de Stefan Frick!
Es kennten öppe ein,
als Chef vom Gwerbverein.
Neu als sini Lebensufgob tuet er definiere,
Sache fotografisch z’dokumentiere.

Tag für Tag und Nacht für Nacht,
hetter sich uf d’Socke gmacht.
Akribisch, verbisse – s’isch garantiert,
daser sini Werk ungfrogt allne präsentiert.
Au loht er sich dezue z’verleite,
sini Bilder im Internet z’verbreite.
S’goht aber nöd um Vögel, Polarliecht oder Ross,
nei, usschliesslich um di neu Velo-Stross!

Er het sich so fescht a dem Thema gribe,
chönntsch meine er heg e Interpellation dezue gschribe.
Frick, bevor de Verchehrsexpert wotsch düregeh,
wotti di zerscht mol selber ufem Velo gseh!

Huh ä Lotsch!

S’Velostross-Debakel
Mitübercho henderen jo sicher au,
de Wiler Velostrosse-Supergau.
De Verchehr usser Rand und Band,
zwiiflisch am gsunde Menscheverstand.
Voll uf d’Chlötz muesch wegem Bus,
de vor dir chunnt au nüme drus,
trümmlig wirdsder wie im Böötli uf de Themse,
vom Slalom-Fahre und vom Bremse.

Über so Projekt tueni ungern murre,
aber nöd mol d’Velos chömet dure!
I bi jo weder Planer no Expert,
aber ohni Rechtsvortritt wärs klärt.
Ussert s’BUV findets ali schräg,
die viele Hindernis im Weg.

Und statt Verbesserige z’initialisiere,
tuetmer grösseri Pflöck anebetoniere.
Da git hässigi Lüüt und höchi Chöschte,
Fazit: nöd nur uf de Velostross – au im BUV hets Pföschte!

Huh ä Lotsch!

Projekt Werkdoof
Prachtvolli Kunscht vo noh und fern,
tüend d’Fuessgängerzone schmücke,
so gsehmer die Betonwüeschti gern,
muesch gad d’Handykamera zücke.
«Mami lueg, das isch 3D!»,
chasch ganz viel Chind sich freue gseh.
Schön isch si gsi, d’StreetArt-Swiss,
doch nochem Gnüsse gits es Gschiss!

Am Mäntig früe, s’isch nöd zum fasse,
im Schrank hends nüme ali Tasse,
chunnt de Werkhof, haut voll ine,
mit de grosse Butzmaschine.
D’Chride-Kunscht brutal zerstört,
d’Künstler findets unerhört.
Alles verschmiert, nöd nur es Bizli,
ghörschen flueche, de Peter Spitzli!

Und was meint d’Stadt? Me git sich chli,
es Missverständnis seg das gsi.
Do frögsch di: Gopf,
hend die kei Auge im Chopf?
Wener die Kunstwerk nöd wönd wahre,
denn lönd de Markus Eugster fahre,
mit Ohm41 kooperiere,
s’Ganze als Aktionskunscht deklariere:
Projektname «Werkdoof» hetti empfohle,
chönd grad nomol Chole usem Stadtfonds hole!

Huh ä Lotsch!

Es paar Churzi
Jede mit es bizli Stil,
het es Exemplar vo Wimmelwil!
Au üsi füft Johreszit wird zelebriert,
diversi Sujets gekonnt integriert,
es Meischterwerk, mit Liebi kreiert,
gern hettis vorane no korrigiert.
Will sofort hanis gseh:
d’Claudia Veit schribt «Fastnacht» ohni «T»!
Jo bisch du nöd im Bilde,
dass du dich i katholische Gefilde,
selber setzisch grad Schachmatt,
bsunders i de Äbtestadt?
Sölls mol e zweiti Uflag geh,
muesch de Punkt unbedingt mitneh,
will wenn das nomol so passiert,
denn wirsch als Nörgeli kremiert!

Huh ä Lotsch!

Gsehsch Lüüt im Zentrum umegammle,
isch d’SVP am Underschrifte sammle.
Nöd schlucke wönds die Chrot,
vom neue Artikel zum Bättelverbot.
Bis zum Schluss hends nervös zitteret,
ihres Referendum isch kläglich gschiteret,
z’wenig Lüüt heget ihres Aliege gstützt,
scho blöd: nödmol bättlä het öppis gnützt!

Huh ä Lotsch!

Noch drü Johr Pause, drü Johr Fruscht,
hend d’Chind ufs s’Steckliträgä Luscht.
Si findets nämli schampar glatt,
de Marsch dur üsi Äbtestadt.
Doch di zentral Figur hets schwer:
I red vom flauschige Zottel-Bär.
Gischem dis usgmolt Mandala,
dörfsch vom Bär es Gschenkli ha.
Und will de Wettbewerb jede kennt,
wirder fürchterlich überrennt.
Die wild Chinderhorde ischem z’viel,
er flüchtet schnell in Hof zu Wil.
Bschlüsst sich i, e churzi Uszit neh,
do mues de sich plötzlich übergeh.
De chotzend Bär, de arm,
e Traditionsgstalt mit Magedarm!
Jo mängmol laufts eim nöd so rund,
liebe Bär: i hoff bisch wieder gsund!

Huh ä Lotsch!

Chasch nünt uf Social Media kommentiere,
ohni 100 Kommentär vom Willi Zurbrügg z’riskiere.
Mit Grossbuechstabe und i mehrere Teil,
da findt glaub nur er selber geil.
Würkli Antworte giter kaum,
isch gfange i sim Fiebertraum,
macht Copy-Paste, do ischer Meischter,
öbs öppis nützt, do scheidet sich d’Geischter.
Liebe Willi, weniger isch mängmol meh,
oder wotsch di würkli als Nörgeli abfackle gseh?

Huh ä Lotsch!

Di ganz FGW fiiret Inauguration – zumindest fascht,
es fehlt en prominente Gascht.
De isch mit Zelt und schwerem Wage,
i de kanadische Wildnis am jage.
Chalti minus 30 Grad hetter,
alles andere als Camping-Wetter.
Mue go dusche, stinkt noch Bär,
s’nasse Tüechli, iisig-schwer,
leiter as Füür, so wirds schnell troche,
goht paar Meter weg go choche,
früürt i de Underhose bis uf d’Chnoche,
plötzlich hetter Plastik groche.
Vo sim Zelt het er de Gstank vernoh,
alles brennt plötzlich lichterloh,
di ganz Usrüschtig, alli Kleider,
gfilmt het die Szene niemer, leider.
Gsehschen frustriert ganz tüüf im Wald,
hoffentli löscht das Füürli bald.
D’Flamme hend am Daniel Hengartner alles gnoh,
wärsch gschider au a d’Fastnacht cho!

Huh ä Lotsch!

Es isch wohr, i mach kein Witz,
Wil isch es Sprungbrett für s’Bistum und d’Schwiz.
Zerscht het de Roman Giger sini Schöfli verloh,
es bessers Jöbli z’St.Galle zueteilt übercho,
de Sebastian Wetter, s’isch jo klar,
wird sogar grad Generalvikar,
und de Benno Zünd, biz en Schlawiner,
wird überraschend höchschte Kapuziner.
De Bischof Beat Grögli machts subtiler,
bekanntlich isch au er en Wiler.
Fazit: Wotsch en Booster für dini Karriere?
Denn loh di z’Wil zum Katholik bekehre!

Huh ä Lotsch!

Scho ewig freut sich Jung und Alt,
allne s’Gfieder am Weier gfallt.
De Georges Amstutz het an Name vo sim Resti denkt,
de Stadt vor Johre zwei schwarzi Schwänli gschenkt.
Doch eines Tages ischs passiert:
Ali Vögel sind krepiert!
Was isch denn das jetzt füren Fluech?
D’Ente und Erpel gsehsch nur no im Wimmelbuech.
D’Vogelgripp grassiert im Weier,
übertreit vo Ente zu Schwan zu Reier.
Zum d’Usbreitig stoppe werdet ali exterminiert,
me het debi aber nöd viel gstudiert.
Drum chunnts denn nochli toller,
miteme Vorstoss vom Sebastian Koller.
Isch jetzt nöd nur s’Brot,
nei au de Pfnüsel, vo de Ente de Tod?
Alles wird abgesperrt mit wenig Wort,
de ganz Weier ein Tatort.
E Misere für Frau und Maa,
immerhin hend a de Wiehnacht ali Entebrote gha!

Huh ä Lotsch!

Churz vor Mitternacht i de Tonhalle,
lohtmers nomol so richtig knalle.
S’Parlament het de Stüürfuess definiert,
s’isch scho so protokolliert.
D’SVP will wieder drü Pünkt abe mit de Stüüre,
und bringt es Rotsreferendum düre.
Das chunt am Alex Lyner nöd i d’Tüte,
d’Schlussglogge söll nonöd lüüte,
statt 118 % drü meh,
so sölls im nögschte Johr usgseh!
Jetzt lueget ali ziemli blöd,
de Fall kennt s’Reglement gar nöd,
d’Meret Grob loht nomol entscheide,
wele Satz wönder vo dene beide?
De Atrag Lyner gwünnt, d’Sach isch gesse,
doch de Andreas Hüssy het anderi Interesse.
Het e Abstimmigsbeschwerde deponiert,
de Kanton wird au no involviert,
niemer weiss jetzt gnau wieviel,
Stüüre me dörf abgeh de Stadt Wil.
En riese Zirkus, aber nöd en schlimme,
de Stüürfuess wird eh s’Prinzepaar bestimme!

Huh ä Lotsch!

Und jetzt a ali s’Kompliment,
wo hüt es Bulle-Versli händ,
denn jede weiss doch wo vom Fach,
do drin z’stoh, das isch Ehresach!
Wie immer wird sie usegeh,
vom Herold vo de FGW.

Huh ä Lotsch!

Michael Sarbach, Herold der FGW